به‌ بۆنه‌ى ٢ى رِه‌شه‌ممه‌ رۆژى جيهانى زمانى زگماكچه‌نده‌ زمان له‌ژیانى مرۆڤدا ده‌ور و كاریگه‌رى هه‌یه‌ ئه‌وه‌نده‌ش زمانى دایكى، كاریگه‌ره‌ له‌سه‌ر پێش كه‌وتن و گه‌شه‌سه‌ندنى كۆمه‌ڵگاكان له‌سه‌رجه‌م بواره‌كانى كۆمه‌لایه‌تى و فه‌رهه‌نگى و...هتد. سه‌ره‌رِاى ئه‌وانه‌ش ده‌ركه‌وتووه‌ قسه‌كردن به‌ زمانى زگماكى به‌ گه‌شه‌ سه‌ندن و شوناسخوازى پته‌وترى مندالان و هه‌ڵسووكه‌وتى باشترى ئه‌وان له‌گه‌ڵ خه‌ساره‌ كۆمه‌لایه‌تیه‌كان له‌قۆناغى جه‌وانى و پێگه‌یشتووى دا ده‌ورى ئه‌رێنى ده‌بینێ. پسپۆرِان و لێكۆڵه‌ره‌وان ده‌ریانخستووه‌ كه‌ قسه‌كردن و خوێندن به‌ زمانى زگماكى هه‌ر له‌منداڵیه‌وه‌ ده‌بێته‌ هۆى ئه‌وه‌ى كه‌سانێكى به‌هره‌مه‌ند و به‌ توانا و خه‌لاق دروست ببێ.
له‌كاتێك دا كه‌ زۆربه‌ى وه‌لاتانى خاوه‌ن زمانه‌ جیاجیاكان به‌و حه‌قیقه‌ته‌ ده‌زانن كه‌ زمانى جۆراوجۆر مایه‌ى پێش كه‌وتن و مانه‌وه‌ى شارستانیه‌ته‌كانه‌ و له‌هه‌وڵى په‌ره‌پێدان و گه‌شه‌دان و پاراستنى زمانه‌ جۆراوجۆره‌كانن، وه‌كوو سوئیس كه‌ ٤ زمانى لێكجیاوازى تێدایه‌ و هێندوستان ٧٠ زمانى تێدایه‌و هه‌مووش به‌یه‌ك رِاده‌ رێزیان لێده‌گیرێ و به‌كارده‌هێندرین و هه‌رگیز به‌ كۆسپێك نایه‌نه‌ ئه‌ژمار له‌لایه‌ن ده‌سه‌لاتدارانى ئه‌و وه‌لاتانه‌ و هه‌روه‌ها له‌كاتێكدا كه‌ ته‌واوى هه‌وڵه‌كانى جیهان له‌پێناو ئه‌وه‌دایه‌ كه‌ پێش له‌ له‌ناوچوونى زمانه‌ جیاجیاكان له‌سه‌رانسه‌رى جیهان بگیردرێ و سازمانى نه‌ته‌وه‌ یه‌كگرتووكانیش به‌هه‌ست كردن به‌و راستیه‌ له‌ساڵى ٢٠٠٠ رۆژى ٢١ى فێوریه‌یان وه‌كوو رۆژى جیهانى زمانى زگماكى دیارى كردووه‌ و پێشنیاریان به‌ وه‌لاتان كردووه‌ كه‌ سیسته‌مى بارهێنان و په‌روه‌رده‌ى خۆیان به‌ شێوه‌یێك دارِێژن كه‌ زمانى زگماكى بپارێزرێ، به‌داخه‌وه‌ شاهیدین كه‌ ده‌سه‌لاتدارانى دژه‌ مرۆڤى ئێران به‌ بیانووى دوور له‌راستى وه‌كوو په‌ره‌دان به‌ بیرۆكه‌ى ته‌جزیه‌ته‌ڵه‌بی و له‌تكردنى ئێران له‌هه‌وڵى توانه‌وه‌ و له‌ناوبردنى زمانه‌ جیاوازه‌كانى ترى پێكهاته‌ى ئێرانن و له‌رێگه‌ى به‌ فه‌رمى ناسین و بالاده‌ست كردنى زمانى فارسی، به‌سه‌ر هه‌موو پێكهاته‌ى ئێران له‌یاساى بنه‌رِه‌تى ئێران(له‌كاتێكدا كه‌ ئێران خاوه‌ن چه‌ندین نه‌ته‌وه‌ و زمان و فه‌رهه‌نگى جیاوازه‌) خه‌ساره‌تێكى هه‌ره‌ گه‌وره‌یان له‌زمانه‌ جیاوازه‌كانى پێكهاته‌ى ئێران داوه‌ و به‌و شێوه‌یه‌ رۆژانه‌ له‌مه‌دره‌سه‌ و خوێندگاكان سووكایه‌تى به‌ زمانه‌ جیاجیاكان ده‌كرێ و مندالانى غه‌یره‌ فارسى ئێران له‌كاتى چوون بۆ خوێندنگه‌ له‌ناوكاو بێ ئه‌وه‌ى شاره‌زاییان هه‌بێ ده‌كه‌ون به‌ سه‌ر زمانێكى نامۆ كه‌ تا ئه‌و كاته‌ نه‌قسه‌یان پێكردووه‌ و نه‌ گوێیان لێبووه‌. به‌رده‌وام ده‌بێ سه‌رنجیان له‌لاى ماناى ووشه‌كانى مامۆستا بێ كه‌ به‌ زمانێكى جیاواز له‌زمانى خۆیان ده‌دوێ. یه‌كێك له‌سیاسه‌ته‌كانى دژه‌ مرۆڤى ئاخوندى درێژه‌كێشانى ئه‌و رِه‌وته‌یه‌ بۆ لاوازى و ته‌نانه‌ت له‌ناوچوونى زمانه‌ جیاجیاكان له‌ناو ئێراندا.
به‌ زانینى ئه‌و حه‌قیقه‌تانه‌ سازمانى خه‌بات وێراى سێ حیزبی ترى كوردستانى ئێران له‌راگه‌ێندراوێكى هاوبه‌ش دا داواى له‌سه‌رجه‌م كۆمه‌لانى خه‌ڵكى كوردستان كرد كه‌ رێز له‌و رۆژه‌ گرینگه‌ به‌ له‌به‌ركردنى جه‌ل و به‌رگى كوردى و چالاكى ترى پێوه‌ندیدار بگرن و هه‌روه‌ها داواى له‌كورده‌كانى ده‌ره‌وه‌ى وه‌لاتیش كردووه‌ كه‌ له‌به‌رده‌م سه‌فارتخانه‌كانى ئێران و رێكخراوى نه‌ته‌وه‌ یه‌كگرتووه‌كان، په‌یره‌وه‌ى كردنى ئه‌وسیاسه‌ته‌ له‌لایه‌ن رژیمى ویلایه‌تى فه‌قیه‌ مه‌حكووم بكه‌ن و داواى یارمه‌تى له‌ وه‌لاته‌ دیموكراته‌ پێش كه‌وتووه‌كانى جیهان بكه‌ن كه‌ بۆ پارستن و گه‌شه‌دان به‌ زمانى زگماكى یارمه‌تیمان بده‌ن و به‌ یه‌ك ده‌نگ هاوارى مافخوازى گه‌لى كورد به‌ گوێى دیكتاتۆران و وه‌لاتانى جیهان دا بده‌ن.

ڕێکه‌وت: 2010-02-20 15:04:28
به‌شی: ( وتاره‌کان )
سه‌یید كامیل نورانى فه‌رد





سیاسی