هاووڵاتیانی كوردستان! میژووی خەباتی ڕزگاریخوازانەی نەتەوەكەمان، پرە لەكارەسات و ناخۆشی و هاوكات پڕ سەروەری بۆ نەتەوەكەمان. یەكێك لەو كارەساتانەی كە بەسە ر نەتەوەكەماندا هاتوە و ڕووداوی جەرگبڕی لێكەوتۆتەوە،فەرمانی جیهادی خومەینیە لەدژی گەلی كورد.35 ساڵ لەمەوبەر كە ڕژیمی تازە بەدەسەڵات گەیشتووی خومەینی بە زۆری كوشتن و بڕین ،جڵەوی دەسەڵاتی لەئێران گرتە دەست، لەیەكەم چركەكانی...
 دەسەڵاتداریەتیدا،سیمای دزێو و شەر ِئەنگێزانەی بۆ گەلانی ئازادیخواز دەرخست و زۆر بێ‌ بەزەییانە تاوی دایە سەركووتی ئازادیخوازان. رژیمی دیكتاتۆری ئاخوندی كە هیچ جۆرە پلانێكی بۆ چارەسەری كێشەی كورد نەبوو، بەردەوام لەهەوڵی پلانی قەتڵی عامی ئەم گەلەدا بوو. خومەینی جەنایەتكار بە هەڵخراندنی هەستی ساویلكەكانی دەوروبەری رۆژ لەدووی رۆژ دژمنی بۆ كورد وخەباتەكەی زیاد كرد و وای بە دەوروبەری دەگەیاند كە كورد سەر بە ئیمپریالیزمە و پاڵی داوە بەكوفرەوە. لەبڵاوكردنەوەی پروپاگەندەی ژەهراوی سەبارەت بەخەڵكی كوردستان و ئامانجەكانی، بەستێنی هێرشێكی بەربڵاوی بۆسەر كوردستان خۆش دەكرد. لە كاتی دانوستانی گەلی كورد و ڕژیم بۆ ستاندنی مافی خودموختاری، بناغەی ڕژیمی لەكوردستان قایم دەكرد و لە رێگەی بەكرێگیراوانی وەك سەفدەری وحەسەنی تۆوی دوو بەرەكی دەچاند. ووتوێژی لەگەڵ كورد كردە دەرفەت بۆ خۆ حەشاردان و هاوكات لەم پێوەندیەشدا توانی دوو بەرەكی بخاتە ڕیزی خەڵكی كوردستانەوە. بەداخەوە پلانە نگریسەكانی تاڕادەیێك چوونە پێش و سەرانی كورد لەم كاتەدا بەبێ‌ گەڕانەوە بۆ مێژوو،كەوتنەداوی تەندراوی خومەینی دژ بەمرۆڤایەتی و ڕیشەی ناكۆكیان لەنێو خۆیاندا قووڵ كردەوە.
 ڕژیمی ئاخوندی كە دانی مافی كوردی لەبەرنامەدا نەبوو، بەداتاشینی كومەڵێك بۆختان وناڕاستی ڕووی هێرشی بەكرێگیراوانی دەكردە كوردستان. دەیبینی كە لەكوردستان سیستمێكی ئازاد لەحاڵی شكڵ گرتن دایە و لەگەڵ بوونی هێندێك ناكۆكی سیاسی، ئەو هەرێمە خەریك بوو دەبوو بە شوێنی حەوانەوەی ئازادیخوازان، لەیەكەم دەرفەتدا خومەینی فەرمانی جیهادی لەدژ دەركرد وفەرمانی بەهێزەكانی كرد كە لەهەموو لایێكەوە هێرش بەرنە سەركوردستان. بەهێرشی هەموو لایەنەی پاسداران بۆ سەركوردستان ودیاری كردنی خاڵخاڵی مرۆڤ كوژ وەك قازی شەرع، حەمامی خوێنیان لەكوردستان وەرێخست و كومەڵكوژیێكی بێوێنەیان ئەنجام دا كە تاكی كورد لەیادی ناكات ومێژووش لەم كردوەیان خۆش نابێت. ئەگەرچی هیرشی دژمن لەناكاو بوو، بەڵام خەڵكی كوردستان زوو لێی هاتنە دەست و دیفاعێكی بێوینەیان كرد. سازمانی خەباتی كوردستانی ئێران بە ڕێبەری مامۆستا سەید جەلال حسینی بە سەنگەر گرتن لە بەكرێگیراوان، قەڵاێكی بەهەیبەتیان دروست كرد و كوردستانیان كردە مەیدانی مەرگی هێزەكانی ڕژیمی خومەینی. فەرمانی جیهادی خومەینی بۆ سەر كوردستان كە فەرمان بوو بۆ سەر مرۆڤایەتی وئازادی وپێشێل كردنی بنەما ئەخلاقیەكان بوو، لەلایەن هێزی پێشمەرگە و خەڵكی كوردستان وەڵامێكی توندی درایەوە و سەری زۆربەی ئەوخائیانەنە لەتاشەبەردەكانی كوردستان درا كە بۆ تاڵان كردنی كوردستان لەم خاكە پیرۆزە وەر ببوون. لەماوەی ئەم شەڕەدا كوردستان بۆ دژمن كرا بەگۆرستان و لە زەربەیێكی گورچكبڕ بەدەستی هێزی پێشمەگەی سازمانی خەباتی كوردستان لەسوپای قودس درا و بووە هۆی تەفروتونا كردنی ئەو هێزە و لەئاكامدا خومەینی ناچار بەئاوڕ بڕ كرد. ئەگەرچی بۆ ماوەیێك لەكوردستان شەڕ كەم بۆوە، بەڵام خومەینی و ڕژیمەكەی كردیانە دەرفەت بۆ خۆ پڕچەك كردن بۆ گیان خەڵكی كوردستان و زۆری نەبرد كە لەهەموو كوردستان شەڕ سەری هەڵدایەوە. 
فەرمانی خومەینی كە 35 ساڵی بەسەردا تێدەپەرێت لەشوێنی خۆیەتی و تا ئێستا بەردەوامن لە كوشتنی خەڵكی كورد و هێرش بۆ سەر ئازادیخوازانی كوردستان. بیگومان فەرمانی جیهاد لەدژی گەلی كوردستان شكڵ وشیوەی جۆراوجۆری پێدراوە و بەهەموو جۆرێك گەرەكیانە ئەم نەتەوە بێ‌ رۆح وگیان بكەن.
 بەڵام شعوری خەڵك و وریایی تاكی كورد،پلانە نگریسەكانی حاكمیەتی كردۆتە بڵقی سەرئاو، بەشێوەیێك كە تا ئێستا ڕژیم نەیتوانیوە لەكوردستان بێ خەم بێ و وەك شوێنێكی ئەمنیەتی چاوی لێنەكات.
 لەیادی ئەم فەرمانە نگریسە دژ بە نەتەوەكەمان، كە هاوكات بەلوتكەی خۆراگری خەڵكی كوردستان دەناسرێت، سڵاو دەنێرین بۆ سەرجەم شەهیدان و بەڵێن بەكەس وكاریشیان دەدەین كە تاسەركەوتنی یەكجاری وگەیشتن بە ئامانجەكانیان هەدا نادەین و درێژەدەری رێبازەكەیان كە وەدی هینانی ئازادی و دیموكراسی بۆ نەتەوەكەمانە بین.
              سازمانی خەباتی كوردستانی ئێران
             كومیتەی ناوەندی
          28ی گەلاوێژی 1393

ڕێکه‌وت: 2014-08-19 15:39:08
به‌شی ( راگەێندراوی سازمانی خەبات ی كوردستان بە بۆنەی ساڵیادی دەركردنی فەرمانی جیهاد دژی گەلی كورد )







تاگی ئه‌رشیڤی خه‌بات مێدیا
خوێنه‌ران له کاتی گه‌ران بۆ ئه‌مانه‌ی خواره‌وه‌ توانیویانه‌ ئه‌و نووسینه بدۆزنه‌وه‌