لە توێی چەندین پرسیار هەڵوێست و بۆچوونی بەرێزیانی وەرگرت كە لە خوارەوە دەقی ئەو دیمانەیە دەخرێتە بەر سەرەنجی خوێنەران.
1ـ لەماوەی چەند مانگی رابردوو بە هێرشی داعش بۆ سەر وەڵاتی عێراق و داگیركردنی چەندین شاری گەورەی ئەو وەلاتە، باسی داعش بۆتە رۆژەڤی سیاسی و زۆر بە بەربڵاوی پانتایی میدیاكانی بە خۆیەوە سەرقاڵ كردووە، ئەساسەن هۆكاری هاتنی داعش بۆ وەڵاتی عێراق و لە پاشاندا هێرش كردنە سەر هەرێمی كوردستان لە لایەن ئەو گرووپە ترۆریستیە بۆ چی دەگەرێنیتەوە و ئامانج و مەبەستەكانی ئەو گرووپە ترۆریستیە چین؟
باباەشێخ حسێنی: سەرهەڵدانی داعش وەك هێزێكی گەورەی ترۆریستی لە ناوچەكەدا بەتێكرا و لە وولاتانی عێراق و سوریە بە تایبەت نە تەنیا باسێكی گرینگ و كیشەییكی گەورەی سیاسیە لە ناوچەكەدا بەڵكو بۆتە هۆی سەرهەڵدانی یەكێك لە كیشە گەورە سیاسی و ئەمنیەتیەكان بۆ تێكرای ناوەندە سیاسیەكانی جیهانی. هەروەك هەموو لایەك ئاگادارن لەدوای دەخالەتە بەردەوامەكانی رژیمی ئاخوندی لە عێراق و وولاتانی دیكەی ناوچەكە و هەروەها پێك هێنانی تاقمە ترۆریستیەكان لە لایەن رژیمی ئێران و هێرشی راستەوخۆ بۆ سەر سوننی مەزهەبەكان لەلایەن تاقمە ترۆریستیەكان و چەندین دەستێوەردانی دیكەی ئاخوندەكانی دەسەڵاتداری ئێران بوونە هۆی ئەوەی پێوەندییەكان لە نێوان نەتەوە و مەزهەبەكان لە وولاتانی ناوچەكە بە شێوەییكی بەربڵاو بەرەو ئاڵۆزی بچێ و تەنانەت جەنگی نێوان مەزهەب و نەتەوەكان بە شێوەییكی رانەگەێندراو سەر هەڵبدا. بێگومان دەستێوەردانەكانی رژیمی ئێران لە كاروباری وولاتاندا و پشتیوانی راستەوخۆ لە هێزە ترۆریستیەكان وای كردوە تاقمە ترۆریستیەكان بەرەو زیادبوون و هەروەها بە هێز بوون بچن.
ئامانجی داعش لە هێرش بۆ سەر عێراق،وەك خۆیان رادەگەێنن بەرپا كردنی حكومەتی ئیسلامی لە شام و عێراقە.دیارە مەبەستیان لە هێرش بۆ سەر هەرێمی كوردستان بە خەیاڵی خۆیان هەوڵیانە بۆ لە بار بردنی حكومەتی كوردستان كە وەك ئاشكرایە حكومەتی كوردستان جیاواز لەوەی حكومەتێكی دیموكراتیكە، لە هەمانكاتدا نمونەییكە بۆ پێكەوە ژیانی بیروڕاكان و ئایین و مەزهەب و نەتەوكان لە چوارچێوەی هەرێمی كوردستان كە ئەو شێوە حكومەتە نە بە كەیفی داعش و نە بە دڵی رژیمە ترۆریست پەروەرەكان لە ئێران و سوریەیە.
2 - هەروەك ئاگادارن بە هاتنی داعش هەل و مەرجێكی نوێ لە ناوچەكە و جیهان هاتۆتە ئاراوە و سەرەڕای هەموو بشێوییەكانی دروستی كردووە لە هەمانكاتدا یەكدەنگیەكی نیونەتەوەیشی بەدوای خۆیەوە هێناوە، ئایا دەكرێ ئەو هەل و مەرجە نوێیە ببیتە دەرفەتێك بۆ كورد و لە رێگەی شەری داعش كورد لە ئاستی جیهان قازانجەكانی بەرەو پێش ببات؟
بابەشێخ حسێنی: وەك ئاشكرایە دەسەڵات و حكومەتی هەرێمی كوردستان لە ناوچەی خۆرهەڵاتی ناوەراستدا جۆرێكی پێَشكەوتوو لە حكومەتداری دیموكراتیكە.كۆمەڵگەی جیهانیش ئەگەر بە راستی مەبەستیان بێ پشتگیری لە حوكمرانی دیموكراتیك لە ناوچەی خۆرهەڵاتی ناوەراستدا بكەن، دەبێ بە هەموو شێوەیەك هاوكاری حكومەتی هەرێمی كوردستان بكەن.
دیارە هێرشی داعش بۆ سەر هەرێمی كوردستان بەڵگەییكی دیارە بو بۆ ئەوەی كە هەرێمی كوردستان سەنگەری دژایەتی كردنی ترۆریستانەو كۆمەڵگەی جیهانیش وەك ئەركێكی بنەرەتی، دەبێ هاوكاری حكومەتی هەرێمی كوردستان بكات. بە بۆچوونی من ئەوە كۆمەڵگەی جیهانیە لە ئێستادا پێویستی بە هەرێمی كوردستانە. بێگومان ئەو هەلومەرجە نۆی یە دەكرێ بە باشترین شێوە كەڵكی بە قازانجی هەرێمی كوردستان لێ وەرگیرێ.
3ـ كاك بابەشیخ سازمانی خەبات ی كوردستانیش لەو شەرەدا بەشداریی كرد . سەرەكی ترین هۆكارەكانی بەشداری كردنی بۆ چی دەگەرێتەوە و لەئەگەری داوای حكوومەت ئامادەی بەشداری كردنی دووبارەن؟
بابەشێخ حسێنی: وەك ئاشكرایە سازمانی خەبات هێزێكی نەتەوەیی و نیشتمانیەو لەپێناو دابین كردنی ماف و ئازادییەكان بۆ خەڵك تێ دەكۆشێ و ماوەی 34 ساڵە لە بەرانبەر رژێمی سەرەرۆ و دواكەوتوی ئاخوندی ئێران لە خەبات و تێكۆشاندایە و لە هەر كۆیەك هەڕەشەو هێرش بۆسەر ئازادییەكانی خەڵك بكرێ، سازمانی خەبات بە پێی توانای دیفاع لە خەڵك دەكات. بە تایبەت ئەو دیفاع كردنەش لە بەرانبەر لایەنێكی ترۆریستی وەك داعش دابێ.
بەشێكی دیكەلە هۆكارەكانی بەشداری سازمانی خەبات لە جەنگی دژی داعش ئەو مەترسیانە بوون كە داعش بۆ سەر بنكەی سەركردایەتی سازمانی خەبات وناوچەی دەشتی هەولێرو دەوروبەری دروستی كردبوو و سازمانی خەبات نە دیتوانی لە حاست ئەو هەڕەشە جیددیە بۆ سەر بنكەی سەركردایەتی وخەڵكی ئەو ناوچەیە بێ دەنگ بێ و هەر كات پێویست بكات سازمانی خەبات ئامادەی روبەروبوونەوەی دوژمنانی ئازادی و دوژمنانی مرۆڤایەتیە.
4ـ رژیمی ئێرانیش یەكێك لە بەشدارانی ئەو شەڕەیە، هۆكارەكانی بەشداری رژیم بۆ چی دەگەرێتەوە و بە بڕوای بەرێزتان ئایا رژیمی ئێران دەتوانێ دەوری ئەرێنی لەو شەرەدا بگێرێ و ئایا ئەوە نابێتە هۆی ئەوەی رژیمی ئێران لە بەردەم بیرورای گشتی سیماێكی تر لە خۆی پیشان بدا و ئەمریكاش نەرمی بنوێنێ لە راست كەیسە هەڵپەسێردراوەكانی رژیمی ئاخوندی؟
بابەشێخ حسێنی: یەكێك لە تایبەتمەندیە دزێوەكان لە سیاسەتە ناوخۆیی و خارجی یەكانی رژیمی ئێران، هەر لە سەرەتای دەست بە كار بوونی تا ئێستا دروست كردنی قەیران بووە و لە رێگەی دروست كردنی ئەو قەیرانانەش سیاسەتە پاوانخوازانەكانی درێژە پێداوە.بە هاتنە مەیدانی قەیرانی داعش و ئاڵۆز بوونی وەزعی ناوچەكە،دەسەڵاتدارانی رژیمی ئێران هەوڵَ دەدەن لە لایەك بە پشتیوانی راستەوخۆ ناراستەوخۆ لە داعش و تاقمە ترۆریستیەكان ئاوەكە لێڵ بكەن و ماسی بگرن و لەلایەكی دیكەوە لە ژێر ناوی دژایەتی داعش هەوڵدەدا هەڵوێستی ووڵاتانی رۆژئاوا لە بەرانبەر رژیم بگۆرێ. هەر لە چوارچێوەدا بەر پرسانی رژیم بە ئاشكرا داوا لە وڵاتانی رۆژئاوایی دەكەن كە لە بەرانبەر بەشداری كردنیان لە شەڕ بەرانبەر داعش، لە حاست بەرنامە ناوكەییەكانی حكومەتی ئێران نەرمی بنۆێنن.
بە بۆچونی من رژیمی ئێران بە هاتنی داعش و گرژی وئاڵۆزی لە ناوچەكەدا زۆر سەرمەست و دڵخۆشەو ئەگەرچی تا ئێستا بەڵگەی حاشا هەڵنەگر لە بەر دەستدا نیە بۆ سەلماندنی پشتیوانی راستەوخۆی رژیمی ئێران لە داعش بەڵام لەراستیدا رژیمی ئێران بە سەرهەڵدانی داعش چەندین قازانجی كردوە یەكێك لە قازانجەكان رێَگە خۆش كرانە بۆ دەستێۆەردانی زیاتر لە كاروباری عێراق و هەروەها هەوڵدانی بەردەوام و هەمەلایەنە بۆ مەعامەلەو سات و سەودای سیاسی بە قازانجی خۆی.بە پێی ئەو كورتە روون كردنەوەی باسم كرد، رژیمی ئێران بەشێك نیە لەو لایەن و وڵاتانەی دژی داعش جەنگ دەكەن، بەڵكو بە پەیرەو كردنی سیاسەتی دوو فاقی پشتیوانی لە داعش و بە ناو جەنگ لە دژی داعش بە دوای قازانج و مەسڵەحەتەكانیەویەتی.
5ـ پێت وایە ئەنجامەكانی ئەو شەرە و داهاتووی عێراق و هەرێمی كوردستان بە گشتی بەرەو كوێ دەروات؟
بابەشێخ حسێنی: هەڵسەنگاندنی وردو دەقیق لە سەر داهاتووی ئەو هەلومەرجە نۆی یە زەحمەتە.بەڵام پێم وایە لە ئاكامدا داعش بەرەو لە ناوچوون و یا زۆر لاوازیی دەچێ.بە باوەری من داهاتوی عێراق بەم زووانە بەرەو ئارامی ودامەزراوی ناچێ،ئەویش هۆكەی دەگەرێتەوە بۆ بوونی جیاوازی و ناكۆكی قووڵَ لە نێوان پێكهاتەی سیاسی و نەتەوەیی و مەزهەبی ودینیەكان.لە پێوەند بە ئاڵۆزی نێوان حكومەتی هەرێمی كوردستان لە گەڵ حكومەتی عێراق،زۆر زەحمەتە كێشەكان و ناكۆكیەكان بە تەواوی چارەسەر بكرێن. بە تایبەت كە رژیمی ئاخوندی بە شێوەییكی بەربڵاو دەست لە كاری ناوخۆی عێراق وەردەدات و بە حكومەتی سێبەر لە عێراق دەزاندرێ.سەبارەت بە هەرێمی كوردستانیش،داهاتوەكەی بەستراوەتەوە بە ئیستراتیژیك وسیاسەتی حكومەتی هەرێمی ونوخبەی سیاسی لە هەرێم. پێم وایە هەلومەرج و داهاتوی سیاسی و ئابووری هەرێمی كوردستانی عێراق بەرەو سەقامگیری ودامەزراوی دەچێ بە تایبەت كە پشتیوانی بەر بلاوی كۆمەڵگەی نێودەوڵەتی لە هەرێمی كوردستان دەبینین.
7ـ پێت وایە ئەركە هەنووكەییەكانی حیزب و لایەنە سیاسیەكانی كوردستانی ئێران چین؟
بابەشێخ حسێنی: بە شێوەییكی جیددی هەوڵ بۆ یەكریزی بدرێ و دوری بكرێ لە گشت ناكۆیە ناسالم و پر زیانە.
8ـ خوێندنەوەتان بۆ پرسی یەكێتی و تەبایی چییە و هەوڵی دڵسۆزان و رووناكبیرانی كورد لەو پێوەندییەدا چۆن هەڵدەسەنگێنی؟
بابەشێخ حسێنی: لە وەلامی پرسیارێكی پێشوو باسی تەبایی و یەكریزی نێوان لایەنە سیاسیەكان و كەڵكەكانیم كرد.بۆ هاتنە دیی ئەو پرس وئامانجە گەورەیە باوەرم وایە روناكبیران دەتوانن دەوری سەرەكی بگێرن و دەبی زۆر و فشار بۆ لایەنە سیاسیەكان بهێنن تا پێ ملی گیانی هاوكاری و تەبایی و ئیستراتیژی هاوبەش بە ئامانجی رزگاریی وروخانی رژیمی دیكتاتۆری ئاخوندی.
9ـ پێت وایە كێشە هەڵپەسێردراوەكانی رژیمی ئاخوندی بەرەو كوێ دەروا و ئایا رژیمی ئێران دەتوانێ بەسەر ئەو قەیرانە یەك لەدوای یەكانەی زاڵ بێ؟
بابەشێخ حسێنی: كێشەی رژیم لە گەڵ وولاتانی رۆژئاوایی لە پێوەند بە گەلاڵە ناوكەییەكان و ترۆریزمی نێودەوڵەتی و پشتیوانی ئاخوندان لە ترۆریزم زۆر لەوە بەرینترە كە بە زوویی چارەسەر بكرێن. سەرەڕای ئیمتیازدانی ئاخوندان بە وولاتانی رۆژئاوایی وپاشگەزبوونەوە لەپالاوتنی ئورانیوم هیچ پێشكەوتنی بەرچاو لە ووتوێژەكانی وولاتانی 5+1 لە گەڵ رژیمی ئاخوندی وەدی نەهاتوە و تەنانەت ئەو چاوەروانی و دڵخۆشیە سەرەتاییانەی كە بۆ گەیشتن بە ئاكامێك بەدی دەكرا و ئاخوندان سەرمەست بوون بەو جامە ژەهرەی خۆرادبوویان پێچەوانەی ئەو گشتە هومێدی ئاخوندان ئەوە بوو كە وولاتانی رۆژئاوایی رازی نەبوون لە ئاكامی ووتوێژەكان و هەروەها ئابڵوقەی زیاتریان بە سەر رژیم سەپاند. بەو پێ یە ئاسۆیەكی روون لە بەردەم ووتوێژەكانی رژیم و وولاتانی رۆژئاوایی بەدی ناكرێ و شاهیدی رێكەوتنێكی كۆنكرێتی و كۆتایی هاتنی ئابڵوقە ئابووری و سیاسیەكانی كۆمەڵگەی جیهانی لە سەر دەسەلاتی ئاخوندی نابین.
سەبارەت بە كێشەناوخۆییەكانی دەسەلات لە ئێران، شاهیدی قووڵ بوونەوەی زیاتری ناكۆكیەكانی نێوان باڵەكانی رژیمین كە لە دوای دەست بە كاربوونی ئاخوند حەسەن روحانی وەك سەرۆك كۆمار، ناكۆكی نێوان باڵەكانی دەسەلات پێی ناوەتە قۆناغێكی حەستەمترو چارەسەر نەكراوتر. بەو پێ یە ئاڵۆزی و كێشەكان لە ئێراندا كۆتایی پێ نایەو چاوەروان دەكرێ بەرەو ئاڵۆزی زیاتر بچێ.
10ـ كاك بابەشیخ ئەمساڵ سازمانی خەبات 34مین ساڵیادی دامەزاندنی خۆی تێپەراند؟ ئەمرۆ بە ئاوردانەوە لەو سی و چوار ساڵە خوێندنەوەت بۆ رابردوو و ئێستا و داهاتووی ئەو تەشكیلاتە چییە و پێت وایە ئەرك و كارەكانی ئەویندارانی سازمانی خەبات لەم هەل و مەرجە دا چییە؟
بابەشێخ حسێنی : سازمانی خەبات ی كوردستانی ئێران لەو ساتەوەی بوونی خۆی بە رەسمی راگەیاندووە ئامانجی خزمەتی گەل و تێكۆشان لە پێناو مافە نەتەوایەتی و نیشتمانیەكانی خەڵكی كوردستانی بووە.كاتێك ئەندامانی سازمانی خەبات بە ئاوردانەوە لە رابردوو دونیایەك سەروەری و دەسكەوت و شانازیی و فیداكاریی و خۆنەویستی و حەماسەی قارەمانانە لە پێناو ئەو ئامانجانە دەبینن و دەبیستن و بە سەرەنجدان بە هەلومەرجی ئەم سەردەمەو مقاومەتی گیانانە لە بەرانبەر تەنگوچەڵەمەكانی رێگەی شۆرش بە بروا و ورەیێكی بە برشت و پتەو، مكۆرتر و ورە بەرزتر دەبن بۆ ئەوەی كە هەنگاوەكان بەرەوپێشەوە قایمتر بهاوێژن و بە فیداكاری كەم وێنە داهاتووێكی روون لەبەردەم سازمانەكەیان دەبینن و بەگەش بینیەوە دەرواننە داهاتوو و قایمتر دەبن لەسەر وەعد و پەیمان لەگەڵ شەهیدان بۆ درێژە دانی رێگەكەیان. بێگومان هەموو تێكۆشەرێكی سازمان دەبێ بەو گەشبینیەوە بەردەوام بێ لەسەر راپەراندنی ئەرك و راسپاردە تەشكیلاتیەكان و هەمیشە خۆیان بە خزمەتكاری گەل و پێشەنگ و نمونە لەهەموو بارەكانی ژیان بزانن و بە پێی ناسكی هەل و مەرجەكە لە تێكۆشان بۆ رزگاریی نەتەوەیی و لەناوبردنی رژیمی دیكتاتوری ئاخوندی هەوڵەكانیان زیاتر و تێكۆشانی بەرچاوتر بكەن.