مامۆستا شێخ رەئوف حوسەینی ئەندامی سەرکردایەتی پێشووی سازمانی خەبات کۆچی دوایی کرد

خەبات مێدیا: بەداخەوە ئەمرۆ سێ شەممە 26ی بانەمەڕی 1401ی ک خ، مامۆستا شێخ رئەوفی حوسەینی کەسایەتی دیار و ئەندامی سەرکردایەتی پێشووی سازمانی خەباتی کوردستانی ئێران و هاوکاری مامۆستا شێخ جەلالی حوسەینی لە دوای ساڵانێکی دوور و درێژ شۆرش و خەبات و خۆراگری دڵە گەورە و پڕ لە ئاواتەکەی لە لێدان کەوت و بۆ هەمیشە خانەوادە، هاوڕێ و هاوسەنگەرانی بە جەستە بەجێ هێشت.
مامۆستا شێخ رەئوفی حوسەینی لە دایکبووی 1318 لە سەرقوڵی ناوچەی بانە و لە ساداتی سەیدانی واژە و بەرزنجەییە. مامۆستا هەر لە هەڕەتی لاوەتیەوە لە خزمەت مامۆستا شێخ عزەدین و مامۆستا شێخ جەلال حوسەینی خوێندوویەتی و لە رێگەی ئەوانیشەوە بە خەباتی مافخوازانە و ئازادیخوازانەی نەتەوەکەی ئاشنا بووە. مامۆستا شێخ رەئوف لە کاتی راپەرینەکانی گەلانی ئێران دژ بە رژیمی پاشایەتی، لە شاری بانە هاوکار و جێی متمانەی مامۆستا شێخ جەلال بووە. لە دوای سەرکەوتنی راپەرینیش لە دەفتەری مامۆستا شێخ عزەدین و لە دامەزرانی سازمانی خەبات و پێشخستنی کارەکانی سازمان بەردەوام بووە لە هاوکاری و پشتیوانیەکانی بۆ مامۆستا شێخ جەلال حوسەینی.
رەوانشاد مامۆستا شێخ رەئوفی حوسەینی ساڵانێکی زۆر ئەندامی سەرکرایەتی سازمانی خەبات و لە ئورگانە جیاجیاکانی سازماندا ئەرک و بەرپرسایەتی وەئەستۆ گرتووەو کارەکانی بەوپەڕی لێبڕاوی و دڵسۆزیەوە بەرێوەبردووە.
مامۆستا شێخ رەئوف مامۆستایەکی ئایینی شۆرشگێڕ و نیشتمانپەروەر و خەباتیەکی خەڵکی و خاکی، خەباتکارێکی جیددی و پێداگر لەسەر ماف و ئازادیەکانی گەلی کورد و بەرنامەکانی سازمانی خەبات بوو. مامۆستا لەدوای چەندین ساڵ مانەوە لە سەنگەری پارێزگاری لە نیشتمان و داکۆکی لە مافەرەواکانی کورد و پاراستنی سازمانی خەبات بەهۆی وەزعی تایبەتی پەریوەی وەڵاتی سوئێد بوو. بەڵام نە ئاوارەیی و نە ژیانی تاراوگە نەیتوانی کار لەسەر هەڵوێستە نەتەوەیی و نیشتمانیەکانی بکەن و مامۆستا شێخ رەئوفی نەمر تا دوا هەناسە بەتاسەوە چاوەروانی رزگاری نیشتمان و گەلی کوردی دەکرد و ئەندام و دڵسۆزی رێبازی مامۆستا شێخ جەلالی نەمر و سازمانی خەبات مایەوە.
رێکخستنی دەرەوەی سازمانی خەباتی کوردستانی ئێران بەبۆنەی کۆچی دوایی مامۆستای وەڵاتپارێز مامۆستا شێخ رەئوفی حوسەینی پرسە و سەرەخۆشی بە مامۆستا ژنە خەجیج، کاک نەبەز، کاک جەمال، کاک سەلاح، کاک زاهیر، کاک هەژار، کاک پێشەوا، خوشکە جەمیلە، خوشکە گوڵاڵە و خوشکە سەرگوڵ و تێکڕای خزمان لە سەرقوڵ و شاری بانە و شار و ناوچەکانی دیکەی کوردستان دەکات و داوا لە خوای گەورە دەکات مامۆستا شێخ رەئوف بخاتە بەر رەحم و بەزەیی خۆی و سەبر و ئارامی بە خانەوادە، کەس و کار و دۆستانی بدات.
إنا لله وإنا إلیه راجعون

سازمانی خەباتی کوردستانی ئێران
رێکخستنی دەرەوە
26ی بانەمەڕی 1401ی ک خ