سازمانی خه‌باتی کوردستانی ئێران
ئەمریکا لە کاتێکدا کە دانوستانە ئەتۆمییەکانی لەگەڵ ڕژیمی ئێران لە بنبەست نزیک بووەتەوە، ئاخاوتنی لە دژی سەرەڕۆیی ڕژیمی ئێران لە بەرانبەر بەرنامە ناوکەییەکانی ڕژیمی ئێران، توندتر کردووەتەوە. ژەنەڕاڵ مایکل کۆریلا، فەرماندەی (سێنتکۆم) پێداگریی لەوە کردەوە کە وڵاتەکەی ئامادەیە بۆ "کاردانەوەی یەکلاکەرەوە" بۆ ئەوەی ڕژیمی ئاخوندی نەتوانێت چەکی ئەتۆمی بەدەستبهێنێت. هەر لەو پێوەندییەدا دۆناڵد ترەمپ، سەرۆکی ئەمریکا ڕایگەیاند کە ڕژیمی ئێران لە دانوستان لەگەڵ ڕۆژاوادا "شەڕانگێزتر" بووە. ترەمپ وتیشی: هەڵسوکەوتەکانی ڕژیمی ئێران بە تەواوی جیاوازە لە ڕۆژانی ڕابردوو و بە شەڕانگێزتر و "نائومێدکەر و سەرسوڕهێنەرتر" وەسفی کرد. لە لایەکی دیکەوە ژەنەڕاڵ مایکل کۆریلا ڕۆژی سێشەممە، ٢٠ی جۆزەردانی ١٤٠٤ لە کۆبوونەوەی لێژنەی هێزە چەکدارەکانی ئەنجومەنی نوێنەرانی ئەمریکا ڕایگەیاند کە فەرماندەیی ناوەندیی ئەمریکا "پلان و بژاردەی" بۆ ترەمپ و وەزیری بەرگری ئامادە کردووە لە ئەگەری نەگەیشتن بە ڕێکەوتن لەگەڵ ڕژیمی ئێران.کۆرێلا وتیشی کە پەنابردن بۆ کردەوەی سەربازی دژ بە ڕژیمی ئێران ئەگەری هەیە، هەروەها ڕایگەیاند کە گەڵاڵەو بژاردەی پێشکەش بە دۆناڵد ترەمپ سەرۆکی ئەمریکا و پیت هێگسێت وەزیری بەرگری ئەمریکا کردووە.هەروەها ڕوونیکردەوە کە دەست و پەیوەندەکانی ڕژیمی ئاخوندی لە لاوازترین ئاستی خۆیاندان، بەڵام ئاستەنگی سەرەکی حوسییەکانن.
