سازمانی خه‌باتی کوردستانی ئێران
دوابەدوای تەقینەوەی چەند ئۆتۆمبیلێکی بۆمبڕێژکراو لە تاران، سەرچاوە ناوچەییەکان ڕایانگەیاند کە لە ڕۆژی هەینیەوە لانیکەم ١٤ زانای ئەتۆمی ڕژیمی ئێران لە هێرشەکانی ئیسرائیلدا کوژراون. هەروەها میدیا ناوخۆییەکانی ئێران تەقینەوەیەکی بەربڵاوی ناوچە جۆربەجۆرەکانی پایتەختیان بڵاوکردەوە.
بەگوێرەی ڕاپۆرتی ڕۆیتەرز، دوو سەرچاوەی ناوچەیی ڕۆژی یەکشەممە ڕایانگەیاند کە لە ڕۆژی هەینیەوە لانیکەم ١٤ زانای ئەتۆمی حکومەتی ئێران لە هێرشەکانی ئیسرائیلدا کوژراون. بەگوێرەی ئاژانسی ڕۆیتەرز، ژمارەیەک لەو کەسانە بە ئۆتۆمبێلی بۆمبڕێژکراو کراونەتە ئامانج.
هاوکات سەرچاوەیەکی ئێرانی بە ئاژانسی هەواڵی دەوڵەتی ئیرنای ڕاگەیاندووە، ئیسرائیل بۆ ئەنجامدانی ئۆپەراسیۆنەکانی لە تاران پەنای بۆ بەکارهێنانی ئۆتۆمبێلی بۆمبڕێژکراو بردووە. ئەو سەرچاوەیە ئاماژەی بەوەشکرد، ڕۆژی یەکشەممە پێنج بەستەی تەقەمەنی لە ناوچە جیاجیاکانی تاران تەقێنراونەتەوە.
هەروەها ڕاپۆرتەکان ئاماژە بە تەقینەوەیەکی دەنگ بەرز لە نزیک باڵەخانەی مەجلیسی ڕژیم دەکەن کە چەند خولەکێک پێش ئەو تەقینەوەیە سیستەمی بەرگری ئاسمانی حکومەتی ئێران بۆ بەرەنگاربوونەوەی هێرشە ئاسمانییەکانی ئیسرائیل چالاک کرابوو.
