سازمانی خهباتی کوردستانی ئێران
کۆمپانیای پەیوەندییەکانی MTNی باشووری ئەفریقا ڕایگەیاندووە کە پلانی کشانەوەی لە بازاڕی ئێران هەیە کەبەهۆی گەمارۆکانی ئەمریکاوە ڕووبەڕووی بەربەستی جددی بووەتەوە.
ڕاڵف موپیتا، بەڕێوەبەری جێبەجێکاری ئەو کۆمپانیایە، ڕۆژی هەینی ١٤ی خەرمانان لە کۆنگرەیەکی ڕۆژنامەوانیدا لە جۆهانسبێرگ ڕایگەیاند: "وەبەرهێنانمان لە ئێران بە کردەوە بووەتە سامانێکی بەستوو، چونکە نە دەتوانرێت پارە بخرێتە ناوی و نە دەتوانرێت دەربهێنرێت."وتیشی کە ستراتیژی MTN "کشانەوەی تەواو لە ڕۆژهەڵاتی ناوەڕاست" بووە، بەڵام ئاستەنگەکانی بەهۆی گەمارۆکانەوە ڕێگر بوون لە جێبەجێکردنی.
MTN، گەورەترین ئۆپەراتۆری مۆبایل لە ئەفریقا، خاوەنی پشکی کەمینەیە لە ئێرانسیل. ئەم کۆمپانیایە لە ساڵی ٢٠٠٤ سەرکەوتوو بوو لە بەدەستهێنانی مۆڵەتی دامەزراندنی ئێرانسیل؛ گرێبەستێک کە هەر لە سەرەتاوە لەگەڵ تۆمەتی گەندەڵی و سکاڵای یاسایی کۆمپانیای تورک سێل بوو.
لە ساڵانی ڕابردوودا، وەزارەتی دادی ئەمریکاش لێکۆڵینەوەی دادوەری سەبارەت بە چالاکییەکانی MTN لە ئێران و ئەفغانستان دەستپێکردووە. شارەزایان دەڵێن ئەو ئۆپەراتۆرە ئێستا نەک هەر ناتوانێت قازانجەکانی لە ئێرانەوە بگوازێتەوە، بەڵکو دەبێت هێشتا وەڵامدەربێت سەبارەت بە چۆنیەتی هاتنە ناو بازاڕی ئێران لە ساڵی ٢٠٠٥.
