سازمانی خهباتی کوردستانی ئێران
سیستان و بەلووچستان: بەهۆی توندوتیژیی مامۆستایەکەوە چاوی خوێندکارێکی ١٠ ساڵان بە سەختی بریندار بوو
بەپێی ڕاپۆرتەکان، توندوتیژی لە ناوەندەکانی خوێندنی ئێران جارێکی دیکە کارەساتی لێ کەوتەوە و لە پارێزگای سیستان و بەلووچستان مامۆستایەک بە شێوەیەکی مەترسیدار هێرشی کردووەتە سەر خوێندکارێک.
ماڵپەڕی "حالوەش" کە تایبەتە بە ڕووماڵکردنی هەواڵەکانی پارێزگای سیستان و بەلووچستان بڵاویکردووەتەوە، لە گوندی **"گیران"**ـی سەر بە شارستانی "فەنووج"، خوێندکارێکی تەمەن ١٠ ساڵان بە دەستی مامۆستاکەی بە سەختی بریندار کراوە.ڕووداوەکە لە کاتی وانەوتنەوەدا ڕوویداوە، کاتێک مامۆستاکە پارچە سۆندەیەکی بە ئاراستەی خوێندکارەکان هەڵداوە. بەپێی زانیارییەکان، سۆندەکە ڕاستەوخۆ بەر چاوی خوێندکارەکە کەوتووە کە ناوی "عیمران ئەربابی"ـیە. بەهۆی توندیی بەرکەوتنەکەوە، لە ئێستادا مەترسییەکی جدی لەسەر بینایی و چاوەکانی ئەو منداڵە دروست بووە.سەرچاوە خۆجێییەکان ئاماژەیان بەوە کردووە کە ئەمە یەکەم جار نییە ئەو مامۆستایە توندوتیژی دەنوێنێت. بەپێی وتەی خەڵکی ناوچەکە، ناوبراو پێشتریش هەمان خوێندکاری ڕووبەڕووی سزای جەستەیی کردووەتەوە، ئەمەش نیگەرانیی لای دایک و باوکان و چالاکوانی مەدەنی لێکەوتووەتەوە."
