سازمانی خهباتی کوردستانی ئێران
براوەی خەڵاتی نۆبڵی ئاشتی: ڤەنزوێلا لەژێر داگیرکاری حکومەتە دیکتاتۆرەکاندایە، لەنێویاندا ڕژیمی ئێران
ماریا کۆرینا ماچادۆ، براوەی خەڵاتی نۆبڵی ئاشتی، لە کۆنفرانسێکی ڕۆژنامەوانیدا ڕایگەیاند کە ڤەنزوێلا «لەژێر داگیرکاریی هێزە بیانییەکاندایە». ئەو حکومەتەکانی ڕووسیا، ڕژیمی ئێران و کوبا و هەروەها گرووپە تاوانکارەکانی بە پاڵپشتی سەرەکیی حکومەتی ڤەنزوێلا دانا و داوای لە وڵاتانی دیموکراتیک کرد کە ڕێگە لەم پشتیوانییانە بگرن.بەپێی ڕاپۆرتی ئاژانسى هەواڵی ڕۆیتەرز، ماچادۆ ڕۆژی پێنجشەممە ٢٠ی سەرماوەز ، لە وەڵامی پرسیارێکدا سەبارەت بەوەی کە ئایا ئەو پاڵپشتی لە «دەستێوەردانی ئەمریکا» لە ڤەنزوێلا دەکات، وتی: «وڵاتەکەمان هەر ئێستا لەژێر داگیرکاریی هێزە بیانییەکاندایە.»ئەو بە ئاماژەدان بەوەی کە «وڵاتانی دیموکراتیک دەبێت ڕێگە لەم چالاکییە نایاساییانە بگرن»، ڕایگەیاند کە بەنیازە خەڵاتی نۆبڵی ئاشتی «لە کاتێکی گونجاودا» بۆ وڵاتەکەی بگەڕێنێتەوە؛ بەڵام ئامادە نەبوو ڕوونکردنەوە بدات کە کەی دەگەڕێتەوە بۆ ڤەنزوێلا.
