سازمانی خهباتی کوردستانی ئێران
خۆکوژیی دوو پەرستار لە کرماشان لە ماوەی چەند ڕۆژی ڕابردوودا
لە ماوەی دوو ڕۆژی ڕابردوودا، دوو پەرستاری خەڵکی کرماشان کە لە ناوەندی دەرمانیی سەر بە زانکۆی پزیشکیی کرماشان کاریان دەکرد، بە هۆی فشاری درێژخایەن و ماندوویەتی پیشەیی کۆتاییان بە ژیانی خۆیان هێنا. بەپێی ڕاپۆرتی سەرچاوەکان ڕۆژی یەکشەممە ٢٣ی سەرماوەز، "شەیدا ئەرزانی" پەرستار لە نەخۆشخانەی "ئیمام ڕەزا"ی کرماشان کۆتایی بە ژیانی خۆی هێنا. هەروەها شەوی شەممە ٢٢ی سەماوەز، "میلاد مروەتی" ٢٥ ساڵە و پەرستار لە ئورژانسی نەخۆشخانەی خومەینی لە کرماشان کۆتایی بە ژیانی خۆی هێنا. ناوبراو لە کۆتا پۆستی ئینستاگرامیی خۆیدا نوسیبووی: "ویستم کۆتایی بە خەم بێنم، بەڵام نەمتوانی، خۆمم کۆتایی پی هێنا". سەعید مورادی وەفا، ئەندامی دەستەی بەڕێوەبەریی پەرستارانی کرماشان بە بڵاوکردنەوەی پۆستێک لە ئینستاگرامیی تایبەتیی خۆی، ئەو ڕووداوەی بە بڕیارێکی کەسی دانەناوە، بەڵکوو هۆکارەکەی بۆ کەڵەکەبوونی قەیرانەکان و پووکانەوەی کادری دەرمانیی نیزامی پەرستاری لە ئێراندا گەڕاندووەتەوە.
