سازمانی خهباتی کوردستانی ئێران
ترەمپ: بە هێرشێکی بەرفراوان بۆ سەر داعش، تۆڵەی خوێنی سەربازەکانمان کردەوە
ویلایەتە یەکگرتووەکانی ئەمریکا بە هێرشێکی سەربازیی بەرفراوان زیاتر لە 70 ئامانجی رێکخراوی داعشی لە نێوەڕاستی سوریە بۆردوومانکرد. دۆناڵد ترەمپ ئەو ئۆپەراسیۆنەی بە "تۆڵەسەندنەوەیەکی زۆر تووند" ناوبرد لە بەرامبەر ئەو سێ ئەمریکییەی حەوتوی رابردوو لە نزیک تەدموور کوژران. هێزەکانی سوریەی دیموکرات- هەسەدە لەبارەی هێرشەکەوە رایگەیاند، ئەو پاڵپشتییە ئاسمانییە بەردەوامە "ئامرازێکی یەکلاییکەرەوەیە" بۆ ئەوەی رێگری لە رێکخستنەوەی شانەکانی ئەو رێکخراوە بکرێ.بەرەبەیانی شەممە 20-12-2025، فەرماندەیی ناوەندیی هێزەکانی ئەمریکا (سێنتکۆم) رایگەیاند، هێزەکانی بە هاوئاهەنگی سپای ئوردن، ئۆپەراسیۆنێکی گشتگیری بۆ سەر ژێرخانی چەک و تەقەمەنیی داعش ئەنجام داوە. لەو هێرشانەدا کە چەندین ناوچەی جیاوازی نێوەڕاستی سوریەی گرتووەتەوە، زیاتر لە 100 مووشەکی وردپێکێن بەکارهێندراون.دۆناڵد ترەمپ، سەرۆکی ئەمریکا لە وتارێکدا لە کارۆلاینای باکوور سەرکەوتنی ئۆپەراسیۆنەکەی راگەیاند و وتی: "تەنیا دوو سەعات پێش ئێستا، گورزێکی کوشندەمان لە چەتەکانی داعش لە سوریە وەشاند. ئەوان هەوڵیان دەدا ریزەکانیان رێکبخەنەوە، بەڵام ئێمە زۆر بە تووندی لێمان دان."
