سازمانی خهباتی کوردستانی ئێران
مەترسی لەسەر تەندروستیی عالیە موتڵەبزادە لە زینداندا
دوای ماوەیەکی زۆر لە بێدەنگی و بێهەواڵی، غەزەل عەبدوڵڵاهی، کچی عالیە موتڵەبزادە، پەردەی لەسەر دۆخی نالەباری دایکی لادا. غەزەل لە پەیامێکدا ڕایگەیاند کە دایکی لە پەیوەندییەکی تەلەفۆنیی کورتدا، هەواڵی تێکچوونی باری تەندروستیی خۆی داوە.
بەپێی زانیارییەکان، ئەو چالاکوانەی مافی ژنان، کە لە ڕێوڕەسمی یادکردنەوەی پارێزەر "خەسرەو عەلیکوردی" گیراوە، ئێستا تەنیا هەندێک دەرمانی ئێرانیی سنوورداری پێدەدرێت. ئەمە لە کاتێکدایە کە خانەوادەکەی ئامادەییان دەربڕیوە دەرمانە سەرەکییەکان دابین بکەن، بەڵام ناوەندە سەرکوتگەرەکان ڕێگری لە گەیشتنی دەرمانەکان دەکەن و دەڵێن: "خۆمان لە کاتی پێویستدا دابینی دەکەین."ئەوەی نیگەرانییەکانی زیاتر کردووە، بەردەوامیی ڕاگرتنی موتڵەبزادەیە لە ژووری تاکەکەسیدا. سنووردارکردنی پەیوەندییە تەلەفۆنییەکان و شێوەی قسەکردنی، ئاماژەن بۆ ئەوەی کە ئەو هێشتا لە ژێر لێپرسینەوەی تونددایە. ئەو فشارانە لە کاتێکدایە کە پزیشکانی پسپۆڕ پیداگریان کردووەتەوە کە بەهۆی باری تەندروستییەوە، دەبێت لە هەر جۆرە سترێس و فشارێکی دەروونی دوور بێت.
