سازمانی خهباتی کوردستانی ئێران
ترامپ: ڕژیمی ئێران لە شکستێکی تەواوەتیدایە؛ دەستمان کردووە بە پاککردنەوەی گەرووی هورمز
دۆناڵد ترامپ، سەرۆکی ویلایەتە یەکگرتووەکانی ئەمریکا، لە پەیامێکی تونددا ڕایگەیاند کە میدیاکان ڕاستییەکان دەشێوێنن و بەپێچەوانەی بانگەشەکان، ڕژیمی ئێران لە "شکستێکی گەورە" دایە.
دۆناڵد ترامپ ڕایگەیاند کە هێزی دەریایی و ئاسمانی حکومتی ئێران لەناوچوون، سیستمەکانی بەرگری و ڕادار تێکشکاون و کارگەکانی بەرهەمهێنانی مووشەک و درۆنیش تا ڕادەیەکی زۆر لەکار کەوتوون. ترامپ هەروەها بانگەشەی ئەوەی کرد کە زۆرێک لە فەرماندە دێرینەکانی ڕژیمی ئێران چیتر لە گۆڕەپانەکەدا نەماون.
سەرۆکی ئەمریکا لە درێژەی قسەکانیدا وتی تەنیا ئامرازی ماوە بۆ ڕژیمی ئێران، هەڕەشەی مینە دەریاییەکانە و ڕایگەیاند کە تەواوی بەلەمە مینڕێژکەرەکانی ڕژیمی ئێرانیش لەناوچوون.
ترامپ هەروەها ڕایگەیاند کە ویلایەتە یەکگرتووەکان پرۆسەی پاککردنەوەی گەرووی هورمزی دەستپێکردووە و ئەو هەنگاوەشی بە هەوڵێک بۆ هاوکاری وڵاتانی جیاوازی جیهان لەوانە چین، ژاپۆن، کۆریای باشوور، فەرەنسا و ئەڵمان ناوبرد.ئەو لە کۆتاییدا ئاماژەی بەوەش کرد کە کەشتییە نەوتهەڵگرە بەتاڵەکان لە وڵاتانی جیاوازەوە بەرەو ئەمریکا لە جووڵەدان بۆ ئەوەی نەوت بار بکەن.
