سازمانی خهباتی کوردستانی ئێران
نامۆ فازڵ مێژووی لە ئەمریکا تۆمار کرد و ئاڵای کوردستانی لە جیهاندا
بەرز کردەوە
نامۆ فازڵ، ئەو جەنگاوەرە لێهاتووەی کورد لە یارییەکانی هونەرە جەنگییە تێکەڵاوەکان
(MMA)، توانی لە یەکەمین چالاکیی وەرزشیی پلاتفۆرمی جیهانیی نێتفلیکسدا،
سەرکەوتنێکی بێوێنە و مێژوویی بەدەستبهێنێت.
لە یارییەکی پڕ لە جۆش و خرۆشدا کە لە شاری لۆس ئەنجلسی ئەمریکا و لە هۆڵی "ئینتویت
دۆم" بەڕێوەچوو، نامۆ فازڵ ڕووبەڕووی جەی بابپانی، جەنگاوەری ئەمریکی بووەوە.
هەرچەندە لە گەڕی یەکەمدا بابپانی هێرشبەرانە دەستی پێکرد و فشاری زۆری بۆ
سەر نامۆ دروست کرد، بەڵام جەنگاوەرە کوردەکە بە تاکتیک و خۆڕاگرییەکی بەرزەوە
توانی بەرگەی هێرشەکان بگرێت.
وەرچەرخانە گەورەکە لە گەڕی دووەمدا ڕوویدا؛ تەنها لە چرکەی ٥٨ی ئەم گەڕەدا، نامۆ
فازڵ بە لێهاتووییەکی زۆرەوە تەکنیکی "خەفەکردنی ئەناکۆندا" (Anaconda Choke)ی
بەکارهێنا و ملی ڕکابەرە ئەمریکییەکەی گرت، کە وای لە بابپانی کرد تەنها دوای
چەند چرکەیەک خۆی بەدەستەوە بدات و تەسلیم ببێت.
ئەو سەرکەوتنە نەک تەنها بۆ نامۆ، بەڵکو بۆ وەرزشی کوردیش بایەخێکی گەورەی هەیە،
چونکە بۆ یەکەمجارە جەنگاوەرێکی کورد لەسەر ئاستی جیهانی و لە پلاتفۆرمێکی وەک
نێتفلیکس بەو شێوەیە دەدرەوشێتەوە. نامۆ بە هەڵکردنی ئاڵای کوردستان لە ناو
جەرگەی ئەمریکا، جارێکی تر ناوی کوردی لە ناوەندە وەرزشییە جیهانییەکاندا
بەرز کردەوە.
شارەزایانی وەرزشی پێشبینی دەکەن ئەو سەرکەوتنە گەورەیە، ڕێگەی نامۆ فازڵ خۆش بکات
بۆ ئەوەی لە داهاتوویەکی نزیکدا بچێتە ناو ڕیزی جەنگاوەرە هەرە پێشەنگەکانی جیهان
لە ڕێکخراوی UFC.
